وجه أمي بريشتي الطفلة
رسالة إلى الجميلة
ماما
أولا تحية للأم الجدعة
للست اللي بمليون راجل
تعبتي معانا جدا أنا عارفة
دايما واحشاني حتى لو كنتِ جنبي
واحشاني الملوخية بتاعتك يا ست الكل
سامحيني ...
استحملتيني كتير
استحملتي شقاوة الطفلة
و حساسية و كآبة المراهقة
و عقلانية الراشدة المجنونة
بحبك أوي
و بحب اهتمامك بي و بمشاعري
بس انتي منفضالي اليومين دول يا حاجة
حتى لو بقا عندي ولاد فدايما بحتاج اهتمامك و حنانك
بس انتِ عارفة راس بنتك الناشفة
و هودؤها و برودها
بس برضه عارفة انها من جوه
حاجة تانية غبر اللي باينة
عارفة انها بتحبك موت
و بتغير عليكِ لسة
و بتخاف عليكِ
من النسمة
سامحيني ...
اذا يوم زعلتك
أو شيلتك أكثر من طاقتك
دايما غصب عني
و لو بإيدي أشيل حمولك
و أزيل همومك
يا أم أحلى ضحكة
يا جميلة يا ودادة
على رأي البشمهندس اللي مبيفهمش حاجة
عارفاه !! :D
بس قوليلي ع السر يا أم القلب الأبيض
ازاي بتحبي الناس كلها
و ازاي كل الناس بتحبك
ازاي بتسيبي على كل وش تقابليه ضحكة
و ليكِ في كل قلب علامة
قوليلي
ازاي أعلم ولادي اللي علمتهولي
ازاي أربيهم
انصحيني يا أم عقل زينة
و كلام حكم ورثتيه عن نينة
ازاي أعلمهم كلامك
و ازاي أعلمهم أخلاقك
و ازاي أعلمهم حب الناس
وحب الخير
و ازاي أرسم على وجوههم ابتسامة من القلب يا أمي
و انتِ عارفة يا ماما
حال الدنيا اللي بقينا فيها
و قوانين الغابة اللي طايحة فينا
و القوي ياكل حق الغلابة
و عشان تبقى قوي لازم تدوس على قلبك بأقدم قديمة
و الحق اللي تايه بين جماعة و جماعة
و الصح اللي تايه بين العري و الخلاعة
و الدين اللي بيضيع من بين ايدينا
و قلوبنا اللي كل مدى و تقسى
و دموعنا اللي نشفت
و الفساد اللي بقا شيء عادي
ادام عنينا
قوليلي يا أمي
ازاي أربي ولادي زي ما ربتينا
و جعت قلبك أنا عارفة بجوابي دا
بس بتوحشيني
ودايما محتجالك يا ماما
ماليش غيرك
ادعيلي يا أمي
عند الفطار الدعوة مستجابة
و ادعي لبلدنا
ربنا يصلحها و يرجعها لينا
وادعي لولادنا
ربنا يهديهم و يهدينا
سلام يا أمي
أما أقوم أعملك كوباية شاي في الخمسينة
هناك تعليقان (2):
مشاعر صادقة اتجاة الأم الرائعة.
وهذه المشاعر تحمل تساؤلا شتى، وحنين وحب...
أدام الله لك فضل الأم
رشيد أمديون. أبو حسام الدين :
أشكرك
آميين
دمت بخير :)
إرسال تعليق